مریدکے،پانچ سالہ لڑکی کی 13سالہ لڑکے سے جبراً شادی کروانے والے تین بااثر چوہدریوں سمیت تمام کردار گرفتار

مریدکے صدر کی آبادی ڈیرہ بشیر پر پانچ سالہ لڑکی کی 13سالہ لڑکے سے جبراً شادی کروانے والے تین بااثر چوہدریوں سمیت تمام کرداروں کو گرفتار کر کے میڈیا کے سامنے پیش کر دیا گیا ۔تفصیلات کے مطابق مریدکے کی آبادی بشیر کوٹ میں باپ کے جرم کی سزا پانچ سالہ بیٹی کو ونی جیسی فرسودہ رسم کی بھینٹ چڑھانے کے واقعہ کا وزیراعلی پنجاب مریم نواز کے سخت نوٹس لینے پر ڈی پی او شیخوپورہ بلال ظفر شیخ خود حرکت میں آئے اور خود مریدکے پولیس کی کمان کرتے ہوئے مختلف دیہات میں چھاپے مار کر اس کیس کے مرکزی کردار سمیت تمام ملزمان کو گرفتار کرکے میڈیا کے سامنے پیش کردیا ۔

ونی کی گئی پانچ سالہ بسمہ اور تیرہ سالہ لڑکا بھی میڈیا کے سامنے لائے گئے ۔گرفتار ملزمان اور نکاح خواں لڑکی اور لڑکے والد باپ بااثر چوہدریوں نے اعتراف کیا کہ انہوں نے ظلم کیا ہے ایسا نہیں کرنا چاہئے تھا ۔اس موقع پرڈی پی او بلال ظفر شیخ کا کہنا تھا کہ کم عمری کی شادی قانوناً جرم ہے جونہی میڈیا کے ذریعے پولیس کو اطلاع ملی کہ بشیر کوٹ میں باپ کے سرکردہ گناہوں کی بھینٹ پانچ سالہ بیٹی کو چڑھایا جارہا ہے اور ونی کیا جارہا ہے پولیس حرکت میں آئی ایک مرکزی کردار پکڑا گیا ،باقی تمام روپوش ہوگئے جنہیں مختلف جگہوں پر چھاپے مار کر گرفتار کرکے قانون کے مطابق کاروائی کی جارہی ہے ۔انہوں نے کہا کہ جرم کرنے والا کتنا ہی بااثر اور طاقتور کیوں نہ ہو قانون کے گرفت سے نہیں بچ سکتا۔